Uimhir 12 de 1954.

AN tACHT UM EASTÁIT DÍ-THIOMNÓIRÍ, 1954.

[An tiontó oifigiúil.]

ACHT DO DHÉANAMH SOCRUITHE FHEABHSAITHE DO BHAINTREACHA DAOINE D'ÉAGFADH GAN TIOMNA A DHÉANAMH I LEITH A MAOINE GO LÉIR NÓ CODA DHI AGUS GAN SLIOCHT INA nDIAIDH. [23ú Márta, 1954.]

ACHTAÍTEAR AG AN OIREACHTAS MAR LEANAS:—

1. —Tiocfaidh an tAcht seo i ngníomh an chéad lá de Mheitheamh, 1954.

2. —Más rud é, tar éis tosach feidhme an Achta seo, go n-éagfaidh fear gan tiomna a dhéanamh i leith gach coda nó aon choda dá mhaoin, réadach nó pearsanta, agus go bhfágfaidh sé baintreach ach nach bhfágfaidh sliocht, beidh feidhm ag forála an Achta seo.

3. —Mura mó ná ceithre mhíle punt glan-luach na maoine a bhfuil dí-thiomnacht ina leith, is leis an mbaintreach an mhaoin go hiomlán agus go heisiach.

4. —(1) Más mó ná ceithre mhíle punt glan-luach na maoine a bhfuil dí-thiomnacht ina leith, beidh teideal ag an mbaintreach chun cuid cheithre mhíle punt di go hiomlán agus go heisiach agus beidh muirear aici ar iomlán na maoine sin i leith na ceithre mhíle punt sin, le hús air ó dháta an bháis do réir ceathair faoin gcéad sa bhliain go dtí go n-íocfar é.

(2) Amhail idir ionadaithe réadacha agus ionadaithe pearsanta an éagaigh, fulaingeofar agus íocfar an muirear sin i gcomhréir le luacha an eastáit réadaigh agus an eastáit phearsanta faoi seach ar éag sé gan tiomna a dhéanamh ina leith.

5. —An soláthar a déantar don bhaintreach le halt 4, is soláthar é de bhreis ar a leas agus a scair, agus gan dochar dá leas agus dá scair, san iarmhar den mhaoin a bheas fágtha tar éis an tsuim cheithre mhíle punt a bheith íoctha, amhail is dá mb'é an t-iarmhar sin iomlán eastáit an éagaigh agus dá mba nár ritheadh an t-alt sin.

6. —Aon mhaoin d'aistreodh, d'uireasa oidhre nó neas-ghaoil, chun an Stáit mura mbeadh an t-alt seo, is leis an mbaintreach í go hiomlán agus go heisiach.

7. —Chun críocha an Achta seo, déanfar glan-luach eastáit réadaigh a chinneadh i gcás feo shimplí trína luach comhlán a laghdú méid comhlán aon mhorgáiste nó príomhshuime eile a bheas muirearaithe air, agus luach aon bhlianachta nó íocaíochta tréimhsiúla eile is inmhuirir air, arna luacháil do réir na dtáiblí agus na rialacha atá sa Sceideal a ghabhas leis an Succession Duty Act, 1853, agus i gcás eastáit saoil do réir na dtáiblí agus na rialacha sin.

8. —Chun críocha an Achta seo, déanfar glan-luach eastáit phearsanta a chinneadh trí fhiacha, caiteachais adhlaicthe agus caiteachais thiomnacha uile an éagaigh agus na dliteanais agus na muirir dhleathacha eile go léir a bhfuil an t-eastát pearsanta sin faoina réir a bhaint as a luach comhlán.

9. —Athghairmtear leis seo an Intestates' Estates Act, 1890.

10. —Féadfar an tAcht um Eastáit Dí-thiomnóirí, 1954 , a ghairm den Acht seo.