Uimhir 7 de 1953.

AN tACHT ÁRACHAIS, 1953.

[An tiontó oifigiúil.]

ACHT DÁ CHUMASÚ DON AIRE TIONSCAIL AGUS TRÁCHTÁLA RÁTHAÍOCHTA A THABHAIRT MAIDIR LE hÁRACHÚ FIONTAR I nDÁIL LE TRÁDÁIL EACHTRANNACH AGUS DO LEASÚ AN DLÍ A BHAINEAS LE GNÓ ÁRACHAIS A SHEOLADH. [24ú Márta, 1953.]

ACHTAÍTEAR AG AN OIREACHTAS MAR LEANAS :—

1. —(1) San Acht seo—

ciallaíonn “Acht 1936” an t Acht Arachais, 1936 (Uimh. 45 de 1936) ;

folaíonn “rathaíocht” conradh chun slánaíocht a thabhairt, go hiomlán nó go páirteach, in aghaidh caillteanais d'aon tsórt ;

ciallaíonn “an tAire” an tAire Tionscail agus Tráchtála ;

(2) Forléireofar an tAcht seo agus Acht 1936 mar aon ní amháin.

2. —(1) Chun onnmhuiriú earraí a spreagadh, féadfaidh an tAire, le toiliú an Aire Airgeadais, comhshocraíochta a dhéanamh chun go dtabharfar do dhaoine, nó ar mhaithe le daoine, a bhfuil gnó nó gairm ar siúl acu sa Stát, ráthaíochta i ndáil le honnmhuiriú, monarú, cóireáil nó imdháil earraí, i ndáil le seirbhísí a thabhairt nó i ndáil le haon ní eile is dóigh leis an Aire ba chabhair chun na críche sin.

(2) Féadfar comhaontuithe le cuideachtana árachais, chun ráthaíochta ó na cuideachtana sin d'athárachú, d'áireamh i gcomhshocraíochta faoin alt seo.

(3) Ní mó ná dhá mhilliún punt iomlán an dliteanais a bheas ar an Aire aon tráth i leith príomhshuimeanna maidir le comhshocraíochta faoin alt seo.

(4) Airleacfar as an bPríomh-Chiste nó a thoradh fáis, agus aisíocfar leis an bPríomh-Chiste as airgead a sholáthrós an tOireachtas, aon tsuim a bheas ag teastáil faoi chomhair dliteanais faoina ndeachaigh an tAire faoin alt seo.

(5) Chun airgead a sholáthar le haghaidh aon airleacain faoin alt seo, féadfaidh an tAire Airgeadais aon tsuim nó suimeanna d'fháil ar iasacht ó dhuine ar bith, agus, chun an iasacht sin d'fháil, féadfaidh sé urrúis a chruthnú agus d'eisiúint agus iad faoi pé ráta úis agus fós faoi réir pé coinníoll i dtaobh aisíoca nó fuascailte nó eile is oiriúnach leis, agus íocfaidh sé isteach sa Stát-Chiste an t-airgead a gheobhas sé ar iasacht amhlaidh.

(6) Is ar an bPríomh-Chiste nó a thoradh fáis a bheas muirear príomhshuime agus úis aon urrús a heiseofar faoin alt seo agus muirear na gcostas faoina raghfar i dtaobh na n-urrús sin d'eisiúint.

(7) Baileofar agus glacfar i pé slí a threorós an tAire Airgeadais, agus íocfar isteach sa Stát-Chiste nó cuirfear chun tairbhe don Stát-Chiste do réir mar threorós an tAire Airgeadais, an t-airgead go léir a gheobhas an tAire de bhun comhshocraíocht faoin alt seo.

3. —(1) Bhéarfaidh an tAire go n-ullamhófar, i pé foirm a threorós an tAire Airgeadais, cuntas ar na fáltais agus ar an gcaiteachas do gach bliain airgeadais i leith comhshocraíocht faoi alt 2 den Acht seo agus iniúchfaidh an tArd-Reachtaire Cuntas agus Ciste na cuntais agus leagfar iad faoi bhráid gach Tí den Oireachtas.

(2) Bhéarfaidh an tAire go n-ullamhófar, go leath-bhliantúil, tuairisceán a thaispeánfas iomlán dliteanas an Aire i leith comhshocraíocht faoi alt 2 den Acht seo a rinneadh i rith na sé mhí roimhe sin agus leagfar an tuairisceán faoi bhráid gach Tí den Oireachtas.

4. —(1) D'ainneoin aon ní in aon fhoráil d'Acht 1936—

(a) ní bheidh cosc ar an Aire géilleadh d'iarratas ó chuideachta choigríche ar cheadúnas árachais chun gnó árachais tóiteáin, tionóisce nó feithicle inneall-ghluaiste a sheoladh de dhroim amháin nach raibh gnó á sheoladh sa Stát ná áit ghnótha sa Stát ag an gcuideachta ar dháta a sonraítear sa bhforáil sin más dóigh leis an Aire, in aon chás áirithe, dá ndeontaí ceadúnas do chuideachta choigríche, go n-éascódh sin deonadh comhar-bhuntáistí do chuideachta Éireannach sa tír ar faoina dlí atá an chuideachta choigríche corpraithe ;

(b) beidh méid na héarlaise a bheas le taisceadh ag cuideachta choigríche faoi alt 22 d'Acht 1936 comhionann leis an éarlais is gá do chuideachta Éireannach a thaisceadh sa tír sin, i gcás inar mó an méid sin ná an éarlais a sonraítear san alt sin.

(2) Féadfaidh an tAire pé coinníollacha is cuí leis a chur ag gabháil le ceadúnas lena mbaineann an t-alt seo agus féadfaidh sé an ceadúnas a chúlghairm más dóigh leis nach bhfuil aon choinníoll acu sin á chomhlíonadh.

(3) Ní bheidh feidhm ag alt 16 d'Acht 1936 maidir le hiarratas ar cheadúnas lena mbaineann an t-alt seo.

5. —(1) Féadfar an tAcht Arachais, 1953 , a ghairm den Acht seo.

(2) Féadfar na hAchta Arachais, 1909 go 1953, a ghairm de na hAchta Arachais, 1909 go 1938, agus den Acht seo le chéile.