Caibidil II.

Conganta Airgid ar Bhagún.

40. —(1) Fé réir forálacha an ailt seo, íocfaidh an Coimisiún, le gach sealbhóir ceadúnais easportálfaidh aon bhagún (is bagún ar n-a tháirgeadh san áitreabh le n-a mbainfidh an ceadúnas san) ar dháta an aistrithe no dá éis sin, congnamh airgid, ar bhagún a heasportálfar amhlaidh, a bheidh do réir an ráta—

(a) a bheidh ceaptha le hordú, bheidh déanta fén gcéad fho-alt ina dhiaidh seo agus a bheidh i bhfeidhm le linn na heasportála, agus

(b) a bhainfidh, do réir an orduithe sin, leis an mbagún san.

(2) Lá nach déanaí ná deireadh an mhí dar tosach dáta an aistrithe, déanfaidh an Coimisiún ordú fén bhfo-alt so, agus féadfaid ina dhiaidh sin, pé uair agus chó minic agus is oiriúnach leo é, ordú do dhéanamh fén bhfo-alt so, ag ceapadh ráta an chonganta airgid ar bhagún a heasportálfar, agus beidh feidhm ag na forálacha so leanas maidir le horduithe ar n-a ndéanamh fén bhfo-alt so, sé sin le rá:—

(a) nuair a bheidh ordú á dhéanamh acu fén bhfo-alt so, féadfaidh an Coimisiún—

(i) bagún do roinnt sna haicmí sin agus san oiread san aicmí (ar n-a míniú mar is ceart dar leis an gCoimisiún) is oiriúnach leis an gCoimisiún, agus

(ii) rátaí deifriúla conganta airgid do cheapadh alos aicmí deifriúla bagúin;

(b) is tuigthe an chéad ordú fén bhfo-alt so do theacht i bhfeidhm ar dháta an aistrithe agus tiocfaidh gach ordú ina dhiaidh sin i bhfeidhm an lá san a luadhfar chuige sin;

(c) fanfaidh gach ordú, ar n-a dhéanamh fén bhfo-alt so, i bhfeidhm go dtí go dtiocfaidh ordú, ar n-a dhéanamh ina dhiaidh sin, i bhfeidhm.

(3) Féadfaidh an Coimisiún, le hordú fén bhfo-alt so (dá ngairmtear ordú fiunraíochta sa bhfo-alt so), a dhearbhú tráth ar bith—

(a) ná beidh aon chongnamh airgid iníoctha fén alt so ar bhagún a heasportálfar ar dháta áirithe no dá éis sin, no

(b) ná beidh aon chongnamh airgid iníoctha ar aon aicme no aicmí áirithe (ar n-a míniú mar is ceart dar leis an gCoimisiún) a heasportálfar ar dháta áirithe no dá éis sin,

agus féadfaid tráth ar bith, le hordú, ordú fiunraíochta do cheiliúradh, agus pé uair a déanfar ordú fiunraíochta, á dhearbhú ná beidh aon chongnamh airgid iníoctha fén alt so ar bhagún no ar aon aicme áirithe bhagúin a heasportálfar ar dháta áirithe no dá éis sin, ní bheidh aon chongnamh airgid iníoctha fén alt so ar bhagún no ar an aicme sin bhagúin (do réir mar a bheidh) a heasportálfar ar an dáta san, no dá éis sin faid a bheidh an t-ordú fiunraíochta san i bhfeidhm.

(4) Féadfaidh an Coimisiún, nuair a bheidh aon aicme áirithe bhagúin á míniú acu chun crícheanna an ailt seo, an aicme sin do mhíniú tríd an tír áirithe chun a n-easportálfar an bagún san do luadh.

(5) Is le haontú an Aire déanfar gach ordú déanfar fén alt so.

41. —(1) Féadfaidh an Coimisiún, pé uair agus chó minic agus is oiriúnach leo é, a dhearbhú, le hordú, go n-íocfaidh an Coimisiún, le gach sealbhóir ceadúnais a dhíolfaidh aon bhagún (is bagún ar n-a tháirgeadh in áitreabh le n-a mbainfidh an ceadúnas san) sa Stát i rith tréimhse áirithe, congnamh airgid, do réir an ráta luadhfar san ordú san, ar bhagún den tsórt san a dhíolfaidh an ceadúnaí sin sa Stát i rith na tréimhse sin, agus pé uair a déanfar aon ordú den tsórt san, íocfaidh an Coimisiún, le gach sealbhóir ceadúnais a dhíolfaidh aon bhagún (is bagún ar n-a tháirgeadh san áitreabh le n-a mbainfidh an ceadúnas san) sa Stát i rith na tréimhse luadhfar san ordú san, congnamh airgid, ar an mbagún uile den tsórt san a dhíolfaidh an ceadúnaí sin sa Stát i rith na tréimhse sin, do réir an ráta luadhfar san ordú san agus a bheidh i bhfeidhm nuair a díolfar an bagún san.

(2) Féadfaidh an Coimisiún tráth ar bith, le hordú fén bhfo-alt so, ordú bheidh déanta fé fho-alt (1) den alt so do leasú.

42. —(1) Féadfaidh gach duine, adeir go bhfuil sé i dteideal congnamh airgid fén gCuid seo den Acht so d'fháil, a iarraidh ar an gCoimisiún sa bhfuirm agus sa tslí orduithe an congnamh airgid sin d'íoc leis.

(2) Beidh i ngach iarratas a déanfar fén alt so, á iarraidh go n-íocfaí congnamh airgid, na mion-innste orduithe i dtaobh an éilimh ar an gcongnamh airgid sin, agus beidh na scríbhinní orduithe bhainfidh leis an éileamh san i dteanta an iarratais.

43. —Is amach as an gCiste Cobhsaíochta a híocfar an t-airgead uile is gá chun aon chongnamh airgid d'íoc fén gCuid seo den Acht so.