44 1936


Uimhir 44 de 1936.


ACHT UM BIADH AGUS DRUGANNA DO DHÍOL (BAINNE), 1936.


ACHT CHUN NA nACHTANNA UM BIADH AGUS DRUGANNA DO DHÍOL, 1875 GO 1935, DO LEASÚ MAIDIR LE BAINNE. [14adh Lúnasa, 1936.]

ACHTUIGHEADH OIREACHTAS SHAORSTáIT ÉIREANN MAR LEANAS:—

Mínithe.

1. —San Acht so—

cialluíonn an abairt “an Príomh-Acht” an Sale of Food and Drugs Act, 1875;

cialluíonn an abairt “Acht 1879” an Sale of Food and Drugs Act Amendment Act, 1879;

cialluíonn an abairt “Acht 1899” an Sale of Food and Drugs Act, 1899;

cialluíonn an abairt “Acht 1935” an t Acht um Biadh agus Druganna do Dhíol (Bainne), 1935 (Uimh. 3 de 1935) ;

cialluíonn an abairt “na hAchtanna” na hAchtanna um Biadh agus Druganna do Dhíol, 1875 go 1935;

cialluíonn an abairt “an tAire” an tAire Rialtais Áitiúla agus Sláinte Puiblí;

tá an bhrí chéanna leis an bhfocal “fíor-bhainne” atá leis in Acht 1935.

Leathnú ar an saghas oifigeach atá údaruithe chun somplaí de bhainne d'fháil agus do thógaint.

2. —(1) Na comhachta chun somplaí de bhainne d'fháil a bronntar le halt 13 den Phríomh-Acht ar oifigeach údaruithe féadfaidh duine (dá ngairmtear oifigeach somplála sa bhfo-alt so) is oifigeach sláintíochta údaruithe do cheanntar shláintíochta iad d'fheidhmiú laistigh den cheanntar san, agus na forálacha de sna hAchtanna bhaineann le somplaí de bhainne ar n-a bhfáil amhlaidh fén alt san 13 ag oifigeach údaruithe beidh feidhm acu maidir le somplaí de bhainne ar n-a bhfáil, de bhuadh an fho-ailt seo, ag oifigeach somplála fé is dá mba oifigeach údaruithe do gheobhadh na somplaí sin fén alt san 13 agus fé is dá mba oifigeach údaruithe an t-oifigeach somplála san, agus beidh feidhm agus éifeacht ag forálacha ailt 17 den Phríomh-Acht (sa mhéid go mbaineann le bainne) agus ailt 16 d'Acht 1899 fé is dá bhfoluíodh na tagairtí atá ionta d'oifigeach údaruithe tagairtí d'oifigeach shomplála.

(2) Na comhachta chun somplaí de bhainne do thógaint gan íoc asta a bronntar le halt 3 d'Acht 1879, mar a leasuítear san le halt 5 d'Acht 1935, ar oifigeach údaruithe féadfaidh duine (dá ngairmtear oifigeach somplála sa bhfo-alt so) is oifigeach sláintíochta údaruithe do cheanntar shláintíochta iad d'fheidhmiú laistigh den cheanntar san, agus na forálacha de sna hAchtanna bhaineann le somplaí de bhainne ar n-a dtógaint amhlaidh fén alt san 3, mar a leasuítear san amhlaidh, ag oifigeach údaruithe beidh feidhm acu maidir le somplaí de bhainne ar n-a dtógaint, de bhuadh an fho-ailt seo, ag oifigeach somplála fé is dá mba oifigeach údaruithe do thógfadh na somplaí sin agus fé is dá mba oifigeach údaruithe an t-oifigeach somplála san, agus beidh feidhm agus éifeacht ag forálacha ailt 4 d'Acht 1879 agus ailt 16 d'Acht 1899 fé is dá bhfoluíodh na tagairtí atá ionta d'oifigeach údaruithe tagairtí d'oifigeach shomplála.

(3) Is fé stiúradh agus ar chostas an údaráis sláintíochta do cheanntar shláintíochta a feidhmeofar na comhachta bronntar le ceachtar den dá fho-alt deiridh sin roimhe seo ar oifigeach shláintíochta údaruithe chun somplaí de bhainne d'fháil no do thógaint laistigh den cheanntar san.

(4) San alt so—

cialluíonn an abairt “oifigeach údaruithe” duine dá n-údaruítear le halt 13 den Phríomh-Acht somplaí de bhiadh agus de dhruganna d'fháil;

nuair a húsáidtear an abairt “oifigeach sláintíochta údaruithe” maidir le ceanntar sláintíochta cialluíonn sí duine is oifigeach sláintíochta fén údarás sláintíochta don cheanntar san agus do cheap an t-údarás sláintíochta san (le toiliú an Aire) chun bheith ina oifigeach shomplála bainne chun crícheanna an Achta Bainne agus Déirithe, 1935 ( Uimh. 22 de 1935 );

cialluíonn an focal “bainne” aon earra bhídh is fíor-bhainne, bainne bearrtha no bainne deighilte, uachtar no bláthach.

An tslí ina dtógfar somplaí de bhainne, etc.

3. —(1) Gach sompla de bhainne tógfar fé sna hAchtanna is sa tslí orduithe tógfar é agus beidh an méid orduithe ann.

(2) Féadfaidh an tAire le hordú, tar éis dó dul i gcomhairle leis an Aire Talmhaíochta, rialacháin do dhéanamh i dtaobh éinní dá dtagartar sa bhfo-alt deiridh sin roimhe seo mar ní orduithe, agus cialluíonn an focal “orduithe” sa bhfo-alt san orduithe leis na rialacháin sin.

(3) Féadfar, le rialacháin fén alt so, slite orduithe deifriúla, chun somplaí de bhainne do thógaint fé sna hAchtanna, do shocrú do réir na gcoimeádán deifriúil agus na modhanna deifriúla ina mbeidh bainne á dhíol agus, i gcás bainne do bheith i ngabhadáin dúnta chun é do dhíol ina mhion-choda sna gabhadáin sin, féadfar socrú do dhéanamh leis na rialacháin sin chun gabhadán amháin den tsórt san do thógaint mar shompla den bhainne sin.

Alt 2 d'Acht 1935 do leasú.

4. —Léireofar alt 2 d'Acht 1935 agus beidh éifeacht aige fé is dá ndeintí an clás so leanas do chur isteach i mír (a) d'fho-alt (1) den alt san in ionad cláis (i) atá anois ann, sé sin le rá:—

“níos lugha ná an percentáiste orduithe (más aon cheann é) de gheir bhainne inti, no”.

Bainne, etc., nach den tsaghas, den tsubstaint ná den cháilíocht cheart do dhíol.

5. —(1) Má dhíolann duine aon earra bhídh mar fhíor-bhainne, mar bhainne bhearrtha no mar bhainne dheighilte, mar uachtar, no mar bhláthaigh, ansan, d'ainneoin éinní atá i bhfo-alt (1) d'alt 2 d'Acht 1935, mar a leasuítear san leis an Acht so, ní tuigfear chun crícheanna ailt 6 den Phríomh-Acht, de bhíthin an méid seo leanas agus dá bhíthin sin amháin, nár dhíol an duine sin, chun dochair don cheannuitheoir, earra bhídh nach de shaghas, de shubstaint ná de cháilíocht na hearra d'iarr an ceannuitheoir sin, sé sin le rá:—

(a) an percentáiste orduithe ar a laighead de gheir bhainne agus an percentáiste orduithe ar a laighead de sholaid bhainne seachas geir bhainne do bheith san earra bhídh do díoladh amhlaidh i gcás í do dhíol mar fhíor-bhainne, no

(b) an percentáiste orduithe ar a laighead de sholaid bhainne, seachas geir bhainne, do bheith san earra bhídh do díoladh amhlaidh i gcás í do dhíol mar bhainne bhearrtha no mar bhainne dheighilte, no

(c) an percentáiste orduithe ar a laighead de gheir bhainne do bheith san earra bhídh do díoladh amhlaidh i gcás í do dhíol mar uachtar, no

(d) an percentáiste orduithe ar a laighead de sholaid bhainne, seachas geir bhainne, do bheith san earra bhídh do díoladh amhlaidh i gcás í do dhíol mar bhláthaigh.

(2) San alt so cialluíonn an focal “orduithe” orduithe le rialacháin ar n-a ndéanamh fé fho-alt (2) d'alt 2 d'Acht 1935.

Alt 7 d'Acht 1935 do leasú.

6. —Léireofar fo-alt (1) d'alt 7 d'Acht 1935 agus beidh éifeacht aige fé is dá ndeintí na focail agus na figiúirí “no má tógtar é gan íoc as fé alt 3 d'Acht 1879, mar a leasuítear san leis an Acht so no mar a leasófar é le haon Acht ina dhiaidh seo” do chur isteach ann i ndiaidh na bhfocal “den Phríomh-Acht” atá anois ann.

Alt 8 d'Acht 1935 do leasú.

7. —Léireofar alt 8 d'Acht 1935 agus beidh éifeacht aige fé is dá ndeintí na focail agus na figiúirí “no má tógtar é gan íoc as fé alt 3 d'Acht 1879, mar a leasuítear san leis an Acht so no mar a leasófar é le haon Acht ina dhiaidh seo” do chur isteach ann i ndiaidh na bhfocal agus na bhfigiúirí “alt 13 den Phríomh-Acht” atá anois ann.

Costaisí.

8. —Sa mhéid go gceadóidh an tAire Airgid é, is amach as airgead a sholáthróidh an tOireachtas a híocfar gach costas fé n-a raghaidh an tAire no an tAire Talmhaíochta fén Acht so.

Gearr-theideal agus luadh.

9. —Féadfar an tAcht um Biadh agus Druganna do Dhíol (Bainne), 1936 , do ghairm den Acht so agus féadfar na hAchtanna um Biadh agus Druganna do Dhíol, 1875 go 1936, do ghairm de sna hAchtanna um Biadh agus Druganna do Dhíol, 1875 go 1935, agus den Acht so le chéile.