CUID II.

Custuim agus Mal.

7. —(1) Eileofar, gearrfar, agus íocfar, ar gach earra dá luaidhtear sa dara colún den Chéad Sceideal a ghabhann leis an Acht so agus a hiomportálfar isteach i Saorstát Éireann an 13adh lá de Bhealtaine, 1936, no dá éis sin, diúité custum do réir an ráta luaidhtear sa tríú colún den Chéad Sceideal san os coinne luadh na hearra sa dara colún san.

(2) I gcás ina bhfuil percentáiste curtha síos sa tríú colún den Chéad Sceideal a ghabhann leis an Acht so os coinne luadh aon earra sa dara colún den Sceideal san, léireofar san mar ní a chialluíonn ráta diúité is có-ionann leis an bpercentáiste sin de luach na hearra san.

(3) I ngach áit ina ndeirtear sa cheathrú colún den Chéad Sceideal a ghabhann leis an Acht so go mbainfidh forálacha ailt 8 den Finance Act, 1919, le diúité luaidhtear sa Sceideal san, bainfidh forálacha an ailt sin 8 leis an diúité sin ach an abairt “Saorstát Éireann” do chur in ionad na habairte “Great Britain and Ireland” agus fé is dá ndeintí na hearraí is ionchurtha fén diúité sin do chur sa Dara Sceideal a ghabhann leis an Finance Act, 1919, adubhradh, sa liost d'earraí go gcuirtear dhá dtrian den lán-ráta i mbaint leo mar ráta thosaíochta.

(4) Na forálacha (más ann dóibh) atá leagtha amach sa cheathrú colún den Chéad Sceideal a ghabhann leis an Acht so ag aon uimhir thagartha sa Sceideal san, beidh éifeacht acu, fé réir forálacha an fho-ailt deiridh sin roimhe seo den alt so, maidir leis an diúité luaidhtear ag an uimhir thagartha san.

8. —(1) In ionad na ndiúitéthe custum, na n-ais-tarraicí custum agus an liúntais chustum atá anois ann (seachas diúitéthe forchuirtear le hordú reachtúil (a bheidh i bhfeidhm de thurus na huaire) ar n-a dhéanamh ag an Ard-Chomhairle agus ar n-a dhaingniú le hAcht den Oireachtas) alos siúicre, moláis, glúcóis agus sacairín, déanfar na diúitéthe custum a luaidhtear sa dara colún de Chuid I den Dara Sceideal a ghabhann leis an Acht so d'éileamh, do ghearradh agus d'íoc alos an tsiúicre, an mholáis, an ghlúcóis agus an tsacairín go léir a hiomportálfar isteach i Saorstát Éireann an 1adh lá de Lúnasa, 1936, no dá éis sin, agus déanfar na hais-tarraicí agus an liúntas atá leagtha amach i gCuid II den Dara Sceideal san d'íoc agus do lomháil alos an tsiúicre, an mholáis, an ghlúcóis agus an tsacairín go léir a hiomportálfar amhlaidh.

(2) In ionad na ndiúitéthe máil, na n-ais-tarraicí máil agus an liúntais mháil atá anois ann alos siúicre, moláis, glúcóis agus sacairín, déanfar, an 1adh lá de Lúnasa, 1936, agus dá éis sin, na diúitéthe máil a luaidhtear sa tríú colún agus sa cheathrú colún de Chuid I den Dara Sceideal a ghabhann leis an Acht so d'éileamh, do ghearradh agus d'íoc alos an tsiúicre, an mholáis, an ghlúcóis agus an tsacairín go léir a déanfar i Saorstát Éireann agus na haistarraicí agus na liúntaisí atá leagtha amach i gCuid II den Dara Sceideal san d'íoc agus do lomháil alos an tsiúicre, an mholáis, an ghlúcóis agus an tsacairín go léir a déanfar amhlaidh.

(3) Beidh feidhm ag alt 40 den Acht Airgid, 1932 ( Uimh. 20 de 1932 ), maidir leis na diúitéthe custum a forchuirtear leis an alt so fé mar atá feidhm ag an alt san maidir leis na diúitéthe luaidhtear ann.

(4) Beidh feidhm ag na forálacha atá i gCuid III den Chéad Sceideal a ghabhann leis an Acht Airgid, 1925 (Uimh. 28 de 1925) , maidir leis na diúitéthe, na hais-tarraicí, agus na liúntaisí forchuirtear no lomháltar leis an alt so fé mar atá feidhm ag na forálacha san maidir leis na diúitéthe, na hais-tarraicí, agus na liúntaisí luaidhtear sa Chéad Sceideal san, ach san gus na hatharuithe agus fé réir na n-atharuithe seo leanas, sé sin le rá:—

(a) i gclás 5, cuirfear an 1adh lá de Lúnasa, 1936, in ionad an 6adh lá de Bhealtaine, 1925;

(b) i gclás 7, déanfar an tagairt d'ailt 26 agus 27 den Acht Airgid, 1925 , adubhradh, do léiriú mar thagairt don alt so.

(5) Beidh feidhm ag alt 25 den Acht Airgid, 1931 ( Uimh. 31 de 1931 ), maidir leis na diúitéthe, na hais-tarraicí, agus na liúntaisí forchuirtear no lomháltar leis an alt so fé mar atá feidhm aige maidir leis na diúitéthe, na hais-tarraicí, agus na liúntaisí luaidhtear san alt san.

9. —(1) In ionad na ndiúitéthe custum is inéilithe fé alt 13 den Acht Airgid, 1935 ( Uimh. 28 de 1935 ), éileofar, gearrfar, agus íocfar ar na hearraí go léir (ach amháin iad san a luaidhtear anso ina dhiaidh seo) a hiomportálfar isteach i Saorstát Éireann an 1adh lá de Lúnasa, 1936, no dá éis sin, agus a bheidh déanta de shiúicre no d'abhar eile chun milsithe no ina mbeidh siúicre no abhar den tsórt san, diúité custum do réir na rátaí seo leanas, sé sin le rá:—

(a) más do réir mheáchainte a horduítear sa liost oifigiúil iompartála an earra d'iontráil ar í d'iomportáil, do réir dhá phingin an púnt, agus

(b) más do réir tomhais a horduítear sa liost oifigiúil iomportála an earra d'iontráil ar í d'iomportáil, do réir scillinge agus ocht bpingne an galún.

(2) Ní déanfar an diúité forchuirtear leis an alt so d'éileamh ná do ghearradh ar aon earra acu so leanas, sé sin le rá:—

(a) beoir,

(b) lionn ubhall,

(c) ullmhóidí cócó,

(d) bainne có-dhlúite lán-uachtair,

(e) torthaí i sioróip agus iad i stáin no i gcannaí séaluithe,

(f) glúcós,

(g) luibh-bheoir,

(h) mil, agus mil shaordha d'áireamh,

(i) molás (agus siúicre iompála agus gach siúicre agus súgh siúicre eile nach féidir a thástáil go hiomlán leis an bpólariscóip),

(j) lionn pioraí,

(k) ullmhóidí chun snasuithe,

(l) annlainn no tarsainn ullamhuithe ina bhfliucháin no ina quasi-fhliucháin,

(m) sacairín (le n-a n-áirmhítear substaintí den nádúir chéanna no chun na húsáide céanna),

(n) galúnach agus púdar galúnaighe agus gach saghas abhair a húsáidtear in ionad galúnaighe,

(o) anairthí,

(p) biotáille,

(q) siúicre,

(r) earraí is ionchurtha fé dhiúité mar mhilseoga siúicre,

(s) uiscí búird,

(t) tobac,

(u) ullmhóidí maisiúcháin,

(v) fíon.

(3) An diúité forchuirtear leis an alt so is diúité é i dteanta aon diúité is inéilithe de thurus na huaire fé ordú reachtúil do rinne an Ard-Chomhairle agus do daingníodh le hAcht den Oireachtas, agus fós is diúité é i dteanta aon diúité is inéilithe alos aon bhiotáille do húsáideadh i ndéanamh no in ullamhú na hearra, ach is diúité é in ionad aon diúité do bheadh inéilithe ar shlí eile ar aon táthchuid eile do húsáideadh i ndéanamh no in ullamhú na hearra.

(4) Beidh feidhm ag alt 40 den Acht Airgid, 1932 ( Uimh. 20 de 1932 ), maidir leis an diúité forchuirtear leis an alt so fé mar atá feidhm ag an alt san maidir leis na diúitéthe luaidhtear ann.

10. —(1) Eileofar, gearrfar, agus íocfar ar gach earra acu so leanas (fe réir na n-eisceacht a luaidhtear sa chéad fho-alt ina dhiaidh seo den alt so) a hiomportálfar isteach i Saorstát Éireann an 13adh lá de Bhealtaine, 1936, no dá éis sin, diúité custum do réir na rátaí uile agus fé seach a luaidhtear fé seach anso ina dhiaidh seo, sé sin le rá:—

(a) ar leathán-ghloine no ar phláta-ghloine nár cuireadh fé aon oibriú ach snasadh, ach gan aon ghloine den tsórt san d'áireamh a bheidh ribithe, eitrithe, fíoghruithe, duillithe, órnuithe, aithneartuithe, daithte, no ópálach— do réir fiche scilling an céadmeáchaint;

(b) ar leathán-ghloine no ar phláta-ghloine bheidh airgeaduithe no miotaluithe—do réir céad agus fiche scilling an céadmeáchaint;

(c) ar gach sórt eile leathán-ghloine no pláta-ghloine—do réir seasca scilling an céadmeáchaint;

(d) ar scátháin (go bhfrámaí no gan frámaí, no cúluithe no nea-chúluithe), ar sheilpeanna agus ar bhord-bháirr a bheidh déanta ar fad no nach mór ar fad de leathánghloine no de phláta-ghloine no de leathán-ghloine agus de phláta-ghloine le chéile—do réir céad agus fiche scilling an céadmeáchaint.

(2) Ní déanfar an diúité forchuirtear leis an alt so d'éileamh ná do ghearradh ar aon earra luaidhtear sa bhfo-alt deiridh sin roimhe seo den alt so agus go gcuirfear ina luighe ar na Coimisinéirí Ioncuim ina taobh gur cuireadh an earra san no aon ghloine is cuid den earra san fé phróiseas lúbtha no cuartha.

(3) Pé uair is dóich leis an Aire Airgid, tar éis dó dul i gcomhairle leis an Aire Tionnscail agus Tráchtála, gur ceart san do dhéanamh, féadfaidh na Coimisinéirí Ioncuim, le ceadúnas, a údarú d'aon duine áirithe, fé réir cólíonadh pé coinníollacha is oiriúnach leo d'fhorchur, aon carraí is ionchurtha fén diúité forchuirtear leis an alt so d'iomportáil gan an diúité sin do bheith íoctha ortha, agus an iomportáil sin do dhéanamh gan teora maidir le n-a ham no le n-a méid no maidir le ceachtar acu no go dteora áirithe maidir le n-a ham no le n-a méid, fé mar is dóich leis na Coimisinéirí Ioncuim is ceart.

11. —(1) San alt so—

cialluíonn an abairt “diúité siamsa” an diúité máil ar a dtugtar “entertainments duty” in alt 1 den Finance (New Duties) Act, 1916, agus is inéilithe fén alt san mar a leasuítear san le hachtacháin ina dhiaidh sin;

cialluíonn an abairt “taidhbhiú pearsanta” siamsa ina mbíonn na taidhbheoirí féin i láthair agus ag taidhbhiú agus gur ní no nithe acu so leanas a bhíonn ann, sé sin le rá:—

(a) taidhbhiú drámúil,

(b) ceol-chuirm, de cheol ghutha no de cheol oirnéise no de cheol ghutha agus oirnéise,

(c) áireamh de ghreasa ilghnéitheacha den tsórt a deintear de ghnáth i gceol-halla;

cialluíonn an abairt “taisbeántas cinematografach” siamsa is taisbeántas de phictiúirí reatha no d'éifeachtaí eile radhairc a taisbeántar le cinematograf no le fearas dá shamhail, pe'ca bhíonn fuaimeanna gutha no eile do bheirtear amach le meáin mheicniúla ag gabháil leo no ná bíonn.

(2) An 5adh lá d'Iúl, 1936, agus dá éis sin déanfar (lasmuich de chás dá bhforáltar a mhalairt leis an gcéad fho-alt ina dhiaidh seo den alt so) diúité siamsa d'éileamh, do ghearradh agus d'íoc, ar gach íocaíocht as dul isteach go dtí aon tsiamsa is taisbeántas cinematografach ar fad no nách mór ar fad, do réir na rátaí seo leanas in ionad na rátaí luaidhtear i bhfo-alt (2) d'alt 24 den Acht Airgid, 1935 ( Uimh. 28 de 1935 ), sé sin le rá:—

(3) Ní bhainfidh alt 22 (alt i dtaobh saoirse do chluichí stáitse, etc., o dhiúité shiamsa) den Acht Airgid, 1931 (Uimh. 31 de 1931) , an 23adh lá de Lúnasa, 1936, ná dá éis sin, le haon tsiamsa in amharclainn go mbeidh litreacha paitinne tugtha amach agus i bhfeidhm ina taobh fén Acht de Pháirlimint na hÉireann do ritheadh sa bhliain 1786 agus dar teideal “An Act for Regulating the Stage in the City and County of Dublin” agus ina ionad san beidh éifeacht ag na forálacha so leanas an 23adh lá de Lúnasa, 1936, agus dá éis sin, sé sin le rá:—

(a) ní déanfar diúité siamsa d'éileamh ná do ghearradh ar íocaíochtaí as dul isteach go dtí aon tsiamsa in aon amharclainn den tsórt san adubhradh más deimhin leis na Coimisinéirí Ioncuim—

(i) gur taidhbhiú pearsanta an siamsa san ar fad, no

(ii) gur taidhbhiú pearsanta cuid den tsiamsa san agus gur taisbeántas cinematografach an chuid eile dhe agus nach lugha ná cúig seachtód per cent. den tsiamsa san ar fad an taidhbhiú pearsanta san;

(b) éileofar, gearrfar, agus íocfar diúité siamsa ar gach íocaíocht as dul isteach go dtí aon tsiamsa in aon amharclainn den tsórt san adubhradh do réir na rátaí atá leagtha amach sa bhfo-alt deiridh sin roimhe seo den alt so más deimhin leis na Coimisinéirí Ioncuim—

(i) gur taidhbhiú pearsanta cuid den tsiamsa san agus gur taisbeántas cinematografach an chuid uile dhe, agus

(ii) ná baineann an mhír dheiridh sin roimhe seo den fho-alt so leis an siamsa san;

(c) i gcás—

(i) diúité siamsa d'íoc ar íocaíochtaí as dul isteach go dtí siamsa in aon amharclainn den tsórt san adubhradh, agus

(ii) an diúité sin d'éileamh do réir tuairisceán deimhnithe ar na híocaíochtaí sin as dul isteach do thug dílseánach na hamharclainne sin do sna Coimisinéirí Ioncuim, agus

(iii) gur deimhin leis na Coimisinéirí Ioncuim gur thaidhbhiú pearsanta cuid den tsiamsa san agus gur thaisbeántas cinematografach an chuid eile dhe agus gur lugha ná cúig seachtód per cent. ach nár lugha ná cúig triochad per cent. den tsiamsa san ar fad an taidhbhiú pearsanta san,

aisíocfaidh na Coimisinéirí Ioncuim le dílseánach an tsiamsa san méid is có-ionann le leath an diúité sin do héilíodh agus do híocadh amhlaidh.

12. —Ní déanfar, an 1adh lá d'Iúl, 1936, ná dá éis sin, diúité siamsa do réir bhrí ailt 1 agus is inéilithe fé alt 1 den Finance (New Duties) Act, 1916, mar a leasuítear san le hachtacháin ina dhiaidh sin, d'éileamh ná do ghearradh ar aon tsiamsa 'na gcruthófar ina thaobh chun sástachta na gCoimisinéirí Ioncuim—

(a) gurb é an Irish Amateur Fencing Federation no club atá có-cheangailte go cuibhe leis an gCó-nascadh san no atá díreach fé n-a stiúradh atá ag cur an tsiamsa ar siúl agus ná fuil sa tsiamsa ar fad ach taisbeántas de spórt na pionnsaireachta, no

(b) gurb é an Irish Free State Table Tennis Association no club atá có-cheangailte go cuibhe leis an gComhlachas san no atá díreach fé n-a stiúradh atá ag cur an tsiamsa ar siúl agus ná fuil sa tsiamsa ar fad ach taisbeántas de chluiche na bord-leadóige.

13. —(1) Ní déanfar na diúitéthe uile agus fé seach a luaidhtear sa tríú colún den Tríú Sceideal a ghabhann leis an Acht so agus a forchuirtear fé seach leis na hachtacháin a luaidhtear sa dara colún den Sceideal san d'éileamh ná do ghearradh ar aon earraí a hiomportálfar isteach i Saorstát Éireann an 13adh lá de Bhealtaine, 1936, no dá éis sin.

(2) Na mion-innste luaidhtear sa cheathrú colún den Tríú Sceideal a ghabhann leis an Acht so is chun a chur in usacht na diúitéthe uile agus fé seach a luaidhtear sa tríú colún den Tríú Sceideal san d'aithint agus chuige sin amháin a cuirtear isteach sa Tríú Sceideal san iad, agus dá réir sin ní dhéanfaidh éinní atá sa cheathrú colún san deifir do léiriú an ailt seo ná an dara colúin ná an tríú colúin den Tríú Sceideal san ná teorannú ná rialú ar a n-oibriú.

14. —Ní déanfar an diúité custum a forchuirtear le halt 11 den Acht Airgid, 1935 ( Uimh. 28 de 1935 ), agus a luaidhtear ag uimhir thagartha 13 sa Dara Sceideal a ghabhann leis an Acht san d'éileamh ná do ghearradh ar aon earra a hiomportálfar isteach i Saorstát Éireann an 1adh lá de Mheán Fhómhair, 1936, no dá éis sin,

15. —(1) Déanfar gach Acht a luaidhtear ag ceann Coda den Cheathrú Sceideal a ghabhann leis an Acht so do leasú mar leanas, sé sin le rá, déanfar gach alt, fo-alt, sceideal, no uimhir thagartha den Acht san no san Acht san a luaidhtear sa dara colún den Chuid sin den Cheathrú Sceideal san do leasú sa tslí luaidhtear sa tríú colún den Chuid sin den Cheathrú Sceideal san os coinne luadh an ailt, an fho-ailt, an sceidil, no na huimhreach tagartha san (do réir mar bheidh) sa dara colún san.

(2) Gach leasú a luaidhtear amhlaidh mar adubhradh sa Cheathrú Sceideal a ghabhann leis an Acht so beidh éifeacht aige (lasmuich de chás dá bhforáltar a mhalairt sa tríú colún den Cheathrú Sceideal san) an 13adh lá de Bhealtaine, 1936, agus ón lá san amach.

(3) Na mion-innste luaidhtear sa cheathrú colún den Cheathrú Sceideal a ghabhann leis an Acht so is chun a chur in usacht na diúitéthe, dá ndeintear deifir fé seach leis na leasuithe uile agus fé seach a luaidhtear sa Cheathrú Sceideal san, d'aithint agus chuige sin amháin a cuirtear isteach sa Cheathrú Sceideal san iad, agus dá réir sin ní dhéanfaidh éinní atá sa cheathrú colún san deifir do léiriú an ailt seo ná an Cheathrú Sceidil sin ná ní oibreoidh chun réime ná éifeachta aon leasuithe luaidhtear sa Cheathrú Sceideal san do leathnú, do theorannú, no do rialú.

16. —(1) Déanfar agus deintear leis seo an Tríú Sceideal a ghabhann leis an Acht Airgid, 1926 (Uimh. 35 de 1926) , do leasú, go bhfeidhm an 13adh lá de Bhealtaine, 1936, agus ón lá san amach, mar leanas agus beidh éifeacht ag alt 20 den Acht san agus ag an Tríú Sceideal san dá réir sin, sé sin le rá:—

(a) cuirfear an provísó so leanas isteach i mír 5 den Tríú Sceideal san i ndeireach na míre sin, sé sin le rá:— “I gcás feithicle le n-a mbaineann an mhír seo agus ná tiomáintear le leictreachas agus gur mó ná tonna ach nách mó ná tonna go gceathrú a meáchaint gan ualach agus go gcuirfear ina luighe ar an Aire Tionnscail agus Tráchtála ina taobh gur có-ghabhadh an fheithicil sin i Saorstát Éireann i slí agus oiread a bheidh ceaduithe ag an Aire sin de thurus na huaire agus gur as páirteanna do rinneadh i Saorstát Éireann do có-ghabhadh amhlaidh í, ar fad no oiread a bheidh ceaduithe ag an Aire sin de thurus na huaire, is do réir ráta fiche púnt, in ionad an ráta de thriocha púnt a luaidhtear thuas, a héileofar, a gearrfar agus a híocfar diúité alos na feithicle sin”;

(b) cuirfear an provísó so leanas isteach i mír 6 den Tríú Sceideal san i ndeireadh na míre sin, sé sin le rá:—

“I gcás aon fheithicle le n-a mbaineann fo-mhír (c) den mhír seo agus ná tiomáintear le leictreachas, agus atá thar sé each-neart déag, agus go gcuirfear ina luighe ar an Aire Tionnscail agus Tráchtála ina taobh gur có-ghabhadh an fheithicil sin i Saorstát Éireann i slí agus oiread a bheidh ceaduithe ag an Aire sin de thurus na huaire agus gur as páirteanna do rinneadh i Saorstát Éireann do có-ghabhadh amhlaidh í, ar fad no oiread a bheidh ceaduithe ag an Aire sin de thurus na huaire, ní déanfar aon diúité d'eileamh ná do ghearradh alos an mhéide is mó each-neart na feithicle sin ná sé each-neart déag”.

(2) Déanfar míreanna (b) agus (f) d'alt 7 den Acht Airgid (Diúitéthe Custum agus Máil), 1933 ( Uimh. 52 de 1933 ), d'athghairm agus beidh feidhm ag an athghairm sin an 13adh lá de Bhealtaine, 1936, agus ón lá san amach.

(3) Ní bheidh feidhm ná éifeacht ag an leasú ná ag an athghairm a deintear leis na fo-ailt sin roimhe seo den alt so maidir le haon fheithicil go gcuirfear ina luighe ar an Aire Tionnscail agus Tráchtála ina taobh gur roimh an 13adh lá de Bhealtaine, 1936, do có-ghabhadh í.

17. —Pé uair is deimhin leis na Coimisinéirí Ioncuim, maidir le hearra a hiomportálfar isteach i Saorstát Éireann an 13adh lá de Bhealtaine, 1936, no dá éis sin, agus is ionchurtha fé dhiúité chustum a bheidh i bhfeidhm an 13adh lá san de Bhealtaine, 1936, no forchuirfear go dleathach ar aon tslí tráth ar bith tar éis an lae sin—

(a) gur thosnuigh iomportálaí na hearra san, laistigh de shé mhí roimh an earra san d'iomportáil, ar bheith ina chomhnaí i Saorstát Éireann no go bhfuil beartuithe aige bona fide le linn na hiomportála san tosnú ar bheith ina chomhnaí i Saorstát Éireann laistigh de shé mhí tar éis na hiomportála san agus, i gceachtar cás, go bhfuil beartuithe aige bona fide bheith ina bhuanchomhnaí i Saorstát Éireann, agus

(b) go raibh an earra san, roimh an tosnú ar an mbuanchomhnaí sin i Saorstát Éireann no roimh an iomportáil sin (pe'ca aca is túisce), in úsáid ag iomportálaí na hearra san no ag á líntighe no ag á theaghlach a bhí in éintigheas leis no go raibh sí in úsáid (ar shlí seachas mar stoc trádála no mar stoc trádála bheidh déanta no déanta go leathrannach, no mar abhar, táthchuid, no compáirt chun stoc trádála do dhéanamh) ag an iomportálaí i gcóir a chéirde no a ghnótha agus, i gceachtar cás, gur cheannuigh no go bhfuair an t-iomportálaí sin no ball dá líntighe no dá theaghlach do bhí in éintigheas leis í chun í d'úsáid go substainteach lasmuich de Shaorstát Éireann, agus

(c) gur chun í bheith á húsáid ag an iomportálaí no ag á líntighe no ag á theaghlach atá in éintigheas leis, no chun í bheith á húsáid (ar shlí seachas mar adubhradh) ag an iomportálaí i gcóir a chéirde no a ghnótha, atá an earra san á hiomportáil isteach i Saorstát Éireann,

féadfaidh na Coimisinéirí Ioncuim, fé réir cólíonadh pé coinníollacha is oiriúnach leo d'fhorchur, a cheadú an earra san d'iomportáil gan an diúité sin do bheith íoctha uirthi.

18. —Féadfaidh na Coimisinéirí Ioncuim, fé réir cólíonadh pé coinníollacha is oiriúnach leo d'fhorchur, a lomháil aon earra acu so leanas, a hiomportálfar isteach i Saorstát Éireann tar éis an Achta so do rith agus is ionchurtha ar í d'iomportáil amhlaidh fé dhiúité chustum (pé tráth agus pé slí forchuireadh é), d'iomportáil gan an diúité sin do bheith íoctha uirthi no aon diúité den tsórt san do híocadh ar iomportáil na hearra san d'aisíoc, sé sin le rá:—

(a) earra atá, dar leis na Coimisinéirí Ioncuim, ina hearra chun úsáide pearsanta no tighis no ina hórnáid de shaghas in-iompair agus gur deimhin leis na Coimisinéirí Ioncuim ina taobh go ndearna duine ar a raibh gnáth-chomhnaí lasmuich de Shaorstát Éireann í thabhairt mar bhronntanas pósta do dhuine atá ar tí a phósta no do pósadh laistigh de shé mhí roimh an earra san d'iomportáil agus atá, no bhí roimh an bpósadh san, ina ghnáth-chomhnaí lasmuich de Shaorstát Éireann agus atá ar intinn bheith ina bhuan-chomhnaí i Saorstát Éireann tar éis an phósta san;

(b) earra gur deimhin leis na Coimisinéirí Ioncuim ina taobh gur cuid í d'estát phearsanta dhuine d'éag lasmuich de Shaorstát Éireann, agus gurb é atá ag iomportáil na hearra san ná ionadaí pearsanta an duine mhairbh sin no duine go raibh gaol fola no cleamhnas aige leis an duine marbh san agus atá tar éis teacht i dteideal na hearra fé uacht an duine mhairbh sin no de bhuadh gan aon uacht a bheith déanta ag an duine marbh san;

(c) grianghraf, prionta, pictiúir go bhfráma, earra snoigheadóireachta, no earra chriadóireachta go gcuirfear ina luighe ar na Coimisinéirí Ioncuim ina thaobh é bheith á iomportáil chun é chur i dtaisbeántas d'earraí den tsaghas chéanna gurb é atá ina bhun ná acadamh, cumann, no club i Saorstát Éireann nach chun brabús do dhéanamh do bunuíodh ná a coimeádtar ar siúl é, in ainneoin na hearra san do choinneáil, i gcásanna áirithe, i Saorstát Éireann tar éis deireadh do bheith leis an dtaisbeántas san;

(d) corn, cuach, sciath no earra eile dá shamhail go gcuirfear ina luighe ar na Coimisinéirí Ioncuim ina thaobh gur rialtas iasachta no roinn de rialtas iasachta no ceann stáit no rialtais iasachta do thíolaic é d'acadamh, do chumann, do chlub no do chóghléasadh eile i Saorstát Éireann nach chun brabús do dhéanamh do bunuíodh ná a coimeádtar ar siúl é;

(e) earra go gcuirfear ina luighe ar na Coimisinéirí Ioncuim ina taobh go ndearnadh lasmuich de Shaorstát Éireann í do bhronnadh ar an duine no í do thíolacadh don duine, ag á mbeidh sí no gur thar a cheann a bheidh sí á hiomportáil, da bharr gradaim in ealadhain, i litríocht, in eolaíocht, no i gcúrsaí spóirt, no de bharr seirbhíse puiblí no ar shlí eile mar luach saothair no mar chuimhne ar iompar no ar shaothar fiúntach;

(f) earra atá dar leis na Coimisinéirí Ioncuim, ina bonn, ina suaitheantas no ina duilleoig a bhaineann le cúrsaí creidimh agus go gcuirfear ina luighe ar na Coimisinéirí Ioncuim ina taobh í bheith á hiomportáil ag na daoine i Saorstát Éireann atá i mbun có-ghléasta dhiadha no dhéirciúla gur lasmuich de Shaorstát Éireann atá a cheann-cheathrú no ag ball d'aon chóghléasadh den tsórt san no ag síntiúsaire dho;

(g) bonn a bhaineann le cúrsaí creidimh agus go gcuirfear ina luighe ar na Coimisinéirí Ioncuim ina thaobh é bheith á iomportáil go pearsanta ag oilithreach atá ag filleadh go Saorstát Éireann o oilithreacht agus gur chun críche seachas chun a dhíolta atáthar á iomportáil amhlaidh;

(h) earra a hiomportálfar le haghaidh no thar cheann Post-Oifig Ríocht Aontuithe na Breataine Móire agus Tuaiscirt Éireann agus go gcuirfear ina luighe ar na Coimisinéirí Ioncuim ina taobh gan an earra san do bheith á hiomportáil amhlaidh ach chun í d'úsáid chun conbharsáidí puist, telegrafa, no telefóna do chothabháil no do dheisiú;

(i) long no árthach eile go gcuirfear ina luighe ar na Coimisinéirí Ioncuim ina taobh gur chun í bhriseadh as a chéile i Saorstát Éireann atá sí á tabhairt go Saorstát Éireann, no earra go gcuirfearr ina luighe ar na Coimisinéirí Ioncuim ina taobh gur cuid í no go raibh sí, agus go bhfuil sí le linn na hiomportála, ina cuid de ghnáth-fheistisí no de ghnáth-fhearas aon luinge no árthaigh eile den tsórt san.

19. —Pé uair a bheidh oifigeach custum agus máil i dteideal, de bhuadh ailt 205 den Customs Consolidation Act, 1876, dul isteach agus cuardach do dhéanamh, fé bharántas ar n-a thabhairt amach fén alt san, i dtigh no in áit eile agus earraí nea-chustumuithe no toirmeasctha do gheobhfar ansan do ghabháil agus do bhreith chun siúil, beidh an t-oifigeach san i dteideal freisin (pe'ca dhéanfa sé aon earraí den tsórt san do ghabháil no do bhreith chun siúil no ná déanfaidh) gach leabhar no scríbhinn eile no aon leabhar no scríbhinn eile do gheobha sé sa tigh no san áit eile sin, agus a chreideann sé do réir réasúin do bhaint le gnóthaí is sárú ar na dlithe bhaineann le custuim, do ghabháil agus do bhreith chun siúil.

20. —(1) San alt so foluíonn an abairt “oifigeach custum agus máil” duine ar bith sa tseirbhís phuiblí bheidh ar fostú de thurus na huaire chun smuglaeracht do chosc.

(2) Baineann an t-alt so le gach earra do bheadh, dá n-iomportálfaí isteach i Saorstát Éireann í, ionchurtha ar an iomportáil sin fé dhiúité chustum (pé tráth no pé slí forchuireadh é) agus le gach earra de shaghas no de chineál go mbeidh sé toirmeasctha do réir dlí de thurus na huaire í d'iomportáil isteach i Saorstát Éireann no gur gá do réir dlí de thurus na huaire ceadúnas no údarás speisialta eile chun í d'iomportáil.

(3) Pé uair a bheidh amhras réasúnta ag oifigeach custum agus máil no ag ball den Ghárda Síochána gur hiomportáladh aon earraí le n-a mbaineann an t-alt so isteach i Saorstát Éireann no gur hiomportáladh amhlaidh iad gan diúité custum d'íoc is inéilithe ar an iomportáil sin no gan ceadúnas no údarás speisialta eile is gá do réir dlí chun na hiomportála san, féadfaidh an t-oifigeach no an ball san (do réir mar bheidh) a cheangal ar dhuine ar bith gur ina sheilbh no fé n-a chúram no gur ar a chuid talmhan no ina áitreabh no i ngar-chomharsanacht a chuid talmhan no a áitreibh do gheobhaidh an t-oifigeach no an ball san na hearraí sin, an fhaisnéis uile bhaineann le gach ceann no le haon cheann de sna habhar fiosrúcháin seo leanas agus atá ar seilbh no ar eolas ag an duine sin do thabhairt don oifigeach no don bhall san agus gach scríbhinn a bhaineann le haon abhar fiosrúcháin den tsórt san agus atá ar seilbh no ar coimeád ag an duine sin do thaisbeáint don oifigeach no don bhall san, sé sin le rá:—

(a) ce'ca hiomportáladh na hearraí sin isteach i Saorstát Éireann no nár hiomportáladh, agus

(b) má hiomportáladh na hearraí sin amhlaidh, an duine d'iomportáil agus an áit inar hiomportáladh agus an tráth do hiomportáladh iad amhlaidh, agus

(c) má hiomportáladh na hearraí sin amhlaidh agus go rabhadar ionchurtha fé dhiúité chustum le linn na hiomportála san, ce'ca híocadh an diúité sin no nár híocadh agus, má híocadh an diúité sin, tráth agus áit a íoctha, agus

(d) má hiomportáladh na hearraí sin amhlaidh agus gur ghá do réir dlí ceadúnas no údarás speisialta eile chun na hiomportála san, ce'ca fuarthas an ceadúnas no an t-údarás san no ná fuarthas.

(4) Gach duine go ndéanfaidh oifigeach custum agus máil no ball den Ghárda Síochána, fé sna comhachta chuige sin a bronntar leis an bhfo-alt deiridh sin roimhe seo den alt so, a cheangal air aon fhaisnéis den tsórt a luaidhtear sa bhfo-alt san do thabhairt don oifigeach no don bhall san (do réir mar bheidh) no aon scríbhinn den tsórt a luaidhtear amhlaidh do thaisbeáint, déanfaidh láithreach, chó fada le n-a eolas agus le n-a chumas, an fhaisnéis sin do thabhairt no an scríbhinn sin do thaisbeáint amhlaidh (do réir mar bheidh), agus má theipeann air no má dhiúltann sé san do dhéanamh no má thugann sé aon fhaisnéis den tsórt san uaidh is eol dó bheith bréagach no mí-threorach beidh sé ciontach i gcionta fén alt so agus ar a chiontú ann ar an slí achmair dlighfear pionós custum de chaoga púnt do chur air.

(5) Pé uair a bheidh duine ciontach in aon teip no diúltadh den tsórt a dearbhuítear leis an bhfo-alt deiridh sin roimhe seo den alt so do bheith ina chionta fén alt so, ansan, in aon imeachta i gcoinnibh an duine sin mar gheall ar chionta i gcoinnibh na ndlithe no ar shárú ar na dlithe bhaineann le custuim adeirtear do rinne sé maidir leis na hearraí le n-ar bhain an teip no an diúltadh san, beidh an teip no an diúltadh san (pe'ca cúisíodh an duine sin sa chionta san no nár cúisíodh), ina fhianaise go dtí go gcruthófar a mhalairt gur iomportáil an duine sin na hearraí sin isteach i Saorstát Éireann agus gur hiomportáladh amhlaidh iad gan na diúitéthe custum (má b'ann dóibh) dob inéilithe ar an iomportáil sin d'íoc agus gan an ceadúnas no an t-údarás speisialta eile (más aon cheann é) ba ghá do réir dlí chun na hiomportála san.

(6) Pé uair a déanfar duine, gur ina sheilbh no fé n-a chúram no gur ar a chuid talmhan no ina áitreabh no i ngar-chomharsanacht a chuid talmhan no a áitreibh do fuair oifigeach custum agus máil no ball den Ghárda Síochána aon earraí le n-a mbaineann an t-alt so, do chúiseamh in aon imeachta dlí i gcionta i gcoinnibh na ndlithe no i sárú ar na dlithe bhaineann le custuim adeirtear do rinne sé maidir leis na hearraí sin, tuigfear gan a thuilleadh fianaise, go dtí go gcruthóidh an duine sin a mhalairt, gur iomportáil an duine sin na hearraí sin isteach i Saorstát Éireann agus gur hiomportáladh amhlaidh iad gan na diúitéthe custum (má b'ann dóibh) dob inéilithe ar an iomportáil sin d'íoc agus gan an ceadúnas no an t-údarás spesialta eile (más aon cheann é) ba ghá do réir dlí chun na hiomportála san.

21. —Pé uair is dóich leis an Aire Airgid gur ceart san do dhéanamh, féadfaidh na Coimisinéirí Ioncuim, fé réir cólíonadh aon choinníollacha is oiriúnach leo d'ordú, a cheadú earra ar bith a bheidh ag teastáil le haghaidh éinní no maidir le héinní acu so leanas d'iomportáil no do sheachadadh gan aon diúité custum no máil d'íoc, sé sin le rá:—

(a) bunú no cothabháil aer-sheirbhíse tar-atlantaighe úsáidfidh no ina n-úsáidfear aer-phort i Saorstát Éireann, no

(b) bunú no cothabháil seirbhísí radio no meteoraíochta no cabhartha eile d'aer-loingseoireacht a bheidh ag gabháil le haon aer-sheirbhís tar-atlantaigh den tsórt san, no

(c) trialacha maidir le bunú no cothabháil aon aer-sheirbhíse tar-atlantaighe den tsórt san.

22. —Féadfaidh na Coimisinéirí Ioncuim, más oiriúnach leo é, a cheadú aon íle hídrocarbóin is ionchurtha fé dhiúité mháil do chur i stóras gan diúité d'íoc, agus féadfaid, más dóich leo agus sa mhéid is dóich leo gur ceart san do dhéanamh, diúité do mhaitheamh ar aon easnamh a thárlóidh in íle cuirfear i stóras amhlaidh más deimhin leo nach éinní nea-dhleathach ná mí-chóir ba chúis le haon chuid den easnamh san.

23. —Duine ar bith ar a gceangaltar no dá n-údaruítear do réir dlí ceadúnas do dheonadh ar dhiúité máil is iníoctha ar an gceadúnas san no alos an cheadúnais sin d'íoc leis féadfaidh, más oiriúnach leis é, an ceadúnas san do dheonadh ar sheic d'fháil ar mhéid an diúité sin, agus pé uair a deonfar aon cheadúnas den tsórt san amhlaidh beidh éifeacht ag na forálacha so leanas, sé sin le rá:—

(a) má séantar an seic sin, beidh an ceadúnas san gan bhrí o dháta a dheonta;

(b) déanfaidh an duine do dheon an ceadúnas san amhlaidh (dá ngairmtear an ceadúnuitheoir san alt so), chó luath agus is féidir é tar éis dó eolas d'fháil i dtaobh an tséanta san, fógra i scríbhinn do chur chun an duine dar deonadh an ceadúnas san amhlaidh (dá ngairmtear an ceadúnaí san alt so) á cheangal air an ceadúnas san do thabhairt suas don cheadúnuitheoir laistigh de dheich lá tar éis an fhógra san do chur chuige;

(c) bhéarfaidh an ceadúnaí an ceadúnas san suas don cheadúnuitheoir laistigh den deich lá san agus má theipeann air san do dhéanamh beidh sé ciontach i gcionta fén alt so agus ar a chiontú ann ar an slí achmair dlighfear pionós máil de chaoga púnt do chur air;

(d) cuirfear an fógra san chun an cheadúnaí tríd an bpost chláruithe agus é dírithe chuige ag á sheoladh mar a bheidh san luaidhte sa cheadúnas san nó, mara mbeidh aon tseoladh den tsórt san luaidhte amhlaidh, ag an seoladh do thug sé don cheadúnuitheoir an tráth do deonadh an ceadúnas san.

24. —Na comhachta le n-a mbaineann alt 27 (alt is foráil ghenerálta i dtaobh pionóis mar gheall ar choinníoll do shárú) den Acht Airgid, 1934 (Uimh. 31 de 1934) , folóid gach comhacht, chun aon choinníoll den tsórt a luaidhtear san alt san d'fhorchur, is comhacht a bronntar no bronnfar, go follus no go foluithe, ar na Coimisinéirí Ioncuim leis an Acht so no le haon Acht eile ar n-a rith (pe'ca roimh an Acht so do rith no dá éis sin é) tar éis an Achta Airgid, 1934 , adubhradh, agus dá réir sin sroichfidh foráil phionósach an ailt sin 27 gach ní agus bainfidh le gach ní déanfar (tré ghníomh no tré fhaillí) tar éis an Achta so do rith agus is sárú ar choinníoll ar n-a fhorchur amhlaidh roimh an Acht so do rith no dá éis sin.