Uimhir 31 de 1935.

ACHT UM SHUNCÁIL CHEADUITHE (LEASÚ), 1935.

ACHTUIGHEADH OIREACHTAS SHAORSTáIT ÉIREANN MAR LEANAS:—

1. —San Acht so—

cialluíonn an abairt “an Príomh-Acht” an tAcht um Shuncáil Cheaduithe, 1933 (Uimh. 34 de 1933) ;

cialluíonn an abairt “an tAire” an tAire Airgid.

2. —An tréimhse de dhá bhliain o am an Phríomh-Achta do rith a luaidhtear i bhfo-alt (1) d'alt 6 den Phríomh-Acht agus an tréimhse chéanna luaidhtear i bhfo-alt (2) den alt san 6 agus an tréimhse chéanna luaidhtear i bhfo-alt (1) d'alt 7 den Acht san deintear leis seo dhá bhliain do chur le gach tréimhse fé seach acu agus chuige sin leasuítear leis seo fo-ailt (1) agus (2) den alt san 6 agus fo-alt (1) den alt san 7, fé seach, tré sna focail “cheithre bliana” do chur in ionad na bhfocal “dhá bhliain” i ngach áit ina bhfuil na focail deiridh sin sna fo-ailt sin fé seach, agus léireofar na hailt sin 6 agus 7 agus beidh éifeacht acu dá réir sin.

3. —An tréimhse de dhá bhliain go leith o am an Phríomh-Achta do rith a luaidhtear i bhfo-alt (3) d'alt 9 den Phríomh-Acht deintear leis seo dhá bhliain do chur léi agus chuige sin leasuítear leis seo an fo-alt san (3) den alt san 9 tré sna focail “ceithre bliana go leith” do chur in ionad na bhfocal “dhá bhlian go leith” atá anois sa bhfo-alt san, agus léireofar an t-alt san 9 agus beidh éifeacht aige dá réir sin.

4. —(1) Pé uair agus chó minic agus is dóich leis san do bheith ceart féadfaidh an tAire, le hordú ar n-a dhéanamh tar éis dul i gcomhairle le Cathaoirleach Coiste Chomhairlithigh na Suncálanna, faidiú do dhéanamh go ceann pé tréimhse is oiriúnach leis agus a luadhfaidh san ordú san ar gach tréimhse no ar aon tréimhse acu so leanas, sé sin le rá, na tréimhsí uile agus fé seach de cheithre bliana o am an Phríomh-Achta do rith a luaidhtear fé seach i bhfo-ailt (1) agus (2) d'alt 6 agus fo-alt (1) d'alt 7 den Phríomh-Acht mar a leasuítear san leis an Acht so, agus an tréimhse de cheithre bliana go leith o am an Phríomh-Achta do rith a luaidhtear i bhfo-alt (3) d'alt 9 den Phríomh-Acht mar a leasuítear san leis an Acht so.

(2) Pé uair a dhéanfaidh an tAire ordú fén alt so ag faidiú aon tréimhse dá luaidhtear sa bhfo-alt san roimhe seo den alt so déanfar an fo-alt den Phríomh-Acht (mar a leasuítear san leis an Acht so) ina luaidhtear an tréimhse sin do léiriú agus beidh éifeacht aige fé is dá ndeintí an tréimhse sin mar a faideofar í leis an ordú san do chur sa bhfo-alt san (mar a leasuítear san amhlaidh) in ionad na tréimhse luaidhtear ann.

5. —Féadfar an tAcht um Shuncáil Cheaduithe (Leasú), 1935 , do ghairm den Acht so.