Uimhir 10 de 1969

AN tACHT UM CHOMHAONTUITHE BRETTON WOODS (LEASÚ), 1969

[An tiontú oifigiúil]

ACHT DO DHÉANAMH SOCRÚ MAIDIR LEIS AN RIALTAS DO GHLACADH LEIS AN LEASÚ ATÁ BEARTAITHE AR AN gCOMHAONTÚ I LEITH AN CHISTE AIRGEADAÍOCHTA IDIRNÁISIÚNTA LENAR GHLAC BORD RIALTÓIRÍ AN CHISTE SIN, D'AISTRIÚ CHUN BANC CEANNAIS NA hÉIREANN FEIDHMEANNA ÁIRITHE DE CHUID AN AIRE AIRGEADAIS (LENA nÁIRÍTEAR ÍOCAÍOCHTAÍ A DHÉANAMH AGUS A GHLACADH) I LEITH AN CHOMHAONTAITHE SIN, DO DHÍLSIÚ DON BHANC SIN SÓCMHAINN ÁIRITHE ATÁ AR MARTHAIN MAIDIR LEIS AN gCISTE SIN, DO LEASÚ AN ACHTA UM CHOMHAONTUITHE BRETTON WOODS, 1957, AGUS DO DHÉANAMH SOCRÚ I dTAOBH NITHE ÁIRITHE A BHAINEANN LEIS NA NITHE RÉAMHRÁITE.

[30 Aibreán, 1969.]

ACHTAÍTEAR AG AN OIREACHTAS MAR A LEANAS:

1. —San Acht seo—

ciallaíonn “an Banc Ceannais” Banc Ceannais na hÉireann;

ciallaíonn “an Príomh-Acht” an tAcht um Chomhaontuithe Bretton Woods, 1957;

ciallaíonn “an leasú beartaithe” an leasú a bheartaítear a dhéanamh ar an gComhaontú Ciste is leasú a bhfuil a théacs leagtha amach sa Sceideal a ghabhann leis an Acht seo.

2. —Ceadaítear leis seo an Rialtas do ghlacadh leis an leasú beartaithe.

3. —(1) Má dhéantar, agus ar chuntar go ndéanfar, an leasú beartaithe (dá ngairtear an leasú san alt seo) agus go mbeidh an Rialtas rannpháirteach sa Chuntas Tarraingthe Speisialta dá bhfuil socrú sa leasú, beidh éifeacht ag forálacha an ailt seo.

(2) Údaraítear leis seo don Bhanc Ceannais thar ceann an Rialtais—

(a) aon chearta tarraingthe speisialta a leithroinnfear ar an Rialtas de bhun an leasaithe a ghlacadh ón gCiste, agus

(b) cearta tarraingthe speisialta seachas na cinn a luaitear i mír (a) den fho-alt seo a fháil de bhun an leasaithe.

(3) Déanfaidh an Banc Ceannais, thar ceann an Rialtais, na cearta a fheidhmiú agus na hoibleagáidí a ghlacadh agus a chomhalladh cibé acu a bhaineann siad le cearta tarraingthe speisialta a glacadh nó a fuarthas faoin alt seo nó le cearta tarraingthe speisialta a fuarthas ar shlí eile de dhroim a bheith rannpháirteach sa Chuntas Tarraingthe Speisialta.

4. —(1) Leasaítear leis seo mar a leanas alt 3 den Phríomh-Acht:

(a) forléireofar fo-alt (2) agus beidh éifeacht aige á cheangal na híocaíochtaí a luaitear i míreanna (a), (b), (c), (d), (f) agus (g) de a dhéanamh, amhail mar is iomchuí agus nuair is iomchuí iad a dhéanamh thar ceann an Rialtais, ag an mBanc Ceannais,

(b) trí “chun an Chiste nó” agus “le hAlt 5 d'Airteagal III den Comhaontú Ciste agus” a scriosadh as fo-alt (3),

(c) forléireofar fo-alt (6) agus beidh éifeacht aige maidir le haon airgead is infhaighte ag an Rialtas ón gCiste ionann is dá gcuirfí “Íocfar leis an mBanc Ceannais aon airgead is infhaighte ag an Rialtas ón gCiste.” in ionad na bhfocal go léir atá ann, agus

(d) cuirfear “faoi mhíreanna (e), (h) (i) agus (f) d'fho-alt (2) den” in ionad “faoin” i bhfo-alt (4) agus i bhfo-alt (7).

(2) Faoi réir fho-alt (3) den alt seo, leasaítear leis seo alt 3 (8) den Phríomh-Acht trí “agus ag mír (b) d'Airteagal XXVII” agus “nó i mír (b) d'Airteagal XXVII” a chur isteach i ndiaidh “d'Airteagal VIII” i mír (c) agus “Alt 9 d'Airteagal IX” faoi seach.

(3) Tiocfaidh fo-alt (2) den alt seo i ngníomh má thagann, agus ar an gcuntar go dtiocfaidh, alt 3 den Acht seo in éifeacht.

5. —(1) Dílsítear leis seo don Bhanc Ceannais an tsócmhainn arb ionannas di an t-éileamh i dtaobh an bhreis atá ag cuóta an Rialtais sa Chiste ar chomhiomlán aon mhéideanna neamhíoctha arb ionannas dóibh nótaí nó oibleagáidí eile a rinne an tAire Airgeadais de bhun alt 3 (3) den Phríomh-Acht nó an Banc Ceannais de bhun alt 6 den Acht seo a bhunú agus a eisiúint chun an Chiste.

(2) Déanfaidh an Banc Ceannais aon mhéid atá de bhreis ag cuóta sin an Rialtais ar aon mhéideanna neamhíoctha arb ionannas dóibh nótaí nó oibleagáidí eile a rinne an tAire Airgeadais a bhunú agus a eisiúint amhlaidh a chreidiúnú in aghaidh aon suime a airleacadh chun an Aire sin faoi alt 3 (7) den Phríomh-Acht agus atá gan íoc.

6. —Féadfaidh an Banc Ceannais aon nótaí neamhúsmhara, do-thráchta, nó aon oibleagáidí eile, dá bhforáiltear le halt 5 d'Airteagal III den Chomhaontú Ciste a bhunú agus a eisiúint chun an Chiste í cibé foirm is oiriúnach leis an mBanc Ceannais, agus íocfaidh ar Banc Ceannais aon íocaíochtaí i leith aon nótaí nó oibleagáidí den sórt sin a bhunófar agus a eiseofar amhlaidh.

7. —San Acht seo agus sa Phríomh-Acht, déanfar aon tagairt don Chomhaontú Ciste a fhorléiriú mar thagairt don chomhaontú sin arna leasú faoi réim agus de réir an Chomhaontú Ciste.

8. —Tiocfaidh ailt 4 (1), 5 agus 6 den Acht seo i ngníomh cibé lá a dhéanfaidh an tAire Airgeadais, le comhaontú leis an mBanc Ceannais, a cheapadh chuige sin le hordú.

9. —Íocfar as airgead a sholáthróidh an tOireachtas aon chaiteachai a thabhóidh an tAire Airgeadais ag riaradh an Achta seo.

10. —(1) Féadfar an tAcht um Chomhaontuithe Bretton Woods (Leasú), 1969, a ghairm den Acht seo.

(2) Forléireofar le chéile mar aon Acht amháin an Príomh-Acht agus an tAcht seo.

(3) Féadfar na hAchtanna um Chomhaontuithe Bretton Woods, 1957 agus 1969, a ghairm den Phríomh-Acht agus den Acht seo le chéile.